பார்வையிழந்தோருக்காக செயற்கை கார்னியா கண்டுபிடிப்பு.

Virakesari.
பார்வையற்றோருக்கு புது நம்பிக்கையூட்டும் வகையில், புதிய செயற்கை கார்னியா கண்டுபிடிக்கப்பட்டுள்ளது.

இதைப் பொருத்துவதன் மூலம் இழந்த பார்வையைத் திரும்பப் பெற முடியும் என விஞ்ஞானிகள் கூறியுள்ளனர். ஸ்வீடன், கனடா, அமெரிக்கா ஆகிய நாடுகளைச் சேர்ந்த விஞ்ஞானிகள் குழு இந்த புதிய சாதனையை நிகழ்த்தியுள்ளது.

கண் பார்வைக்கு மிக முக்கியமானது கார்னியா எனப்படும் கருவிழி. அது பாதிக்கப்பட்டார் பார்வை பறிபோகும். இந்த நிலையில் இந்த கார்னியாவை செயற்கையாக உருவாக்கி மூன்று நாட்டு விஞ்ஞானிகள் குழு சாதனை படைத்து, பார்வையற்றோருக்கு புதிய வெளிச்சத்தைக் கொடுத்துள்ளது.

இதுகுறித்து ஆய்வுக் குழுவில் இடம் பெற்றவர்களில் ஒருவரான ஒட்டாவா மருத்துவமனை ஆய்வுக் கழக டாக்டர் கிரிபித் கூறுகையில், செயற்கை கல்லோஜனை பயன்படுத்தி இந்த செயற்கை கார்னியாவை உருவாக்கியுள்ளோம். கடந்த இரண்டு ஆண்டுகளாக இந்த செயற்கை கார்னியாவை பாதிக்கப்பட்ட நோயாளிகளுக்குப் பொருத்து ஆய்வு செய்தோம்.

அதில் ஆய்வுக்குட்பட்டோருக்கு நல்ல முன்னேற்றம் காணப்படுகிறது. இந்த செயற்கை கார்னியாவை கண்ணில் பொருத்துவதன் மூலம் பாதிப்புக்குள்ளான பகுதியில் செல்களின் வளர்ச்சி தூண்டப்பட்டு பார்வை திரும்ப வாய்ப்பு ஏற்படுகிறது.

கிட்டத்தட்ட கான்டாக்ட் லென்ஸ் போல இந்த செயற்கை கார்னியா பொருத்தப்படுகிறது என்றார்.

ஈராக்கில் அமெரிக்க வீரர்கள் இனி தங்கும் காலம் குறைவு.

Virakesari.
ஈராக்கில் தாக்குதல் நடவடிக்கையை நிறுத்த அமெரிக்கா முடிவு செய்துள்ளது. மேலும், வேகமாக அங்கிருந்து அமெரிக்க இராணுவத்தினரை திரும்பப் பெறுவதில் அதிபர் ஒபாமா தீவிரமாக இருக்கிறார்.

அமெரிக்க அதிபராக இருந்த புஷ், 2003ஆம் ஆண்டு படைகளை அனுப்பி சதாம் உசேனுக்கு எதிராக போர் தொடுத்தார். அது முதல் கொண்டு அமெரிக்க படைகள் ஈராக்கில் தங்கி விட்டன.

தற்போதைய அதிபர் ஒபாமா தேர்தல் பிரசாரத்தின் போது, அமெரிக்க படைகளை வாபஸ் பெற போவதாக தெரிவித்திருந்தார். இவரது வாக்குறுதி படி ஈராக்கிலிருந்த அமெரிக்கப் படைகள் படிப்படியாக குறைக்கப்பட்டு வருகின்றன.

அடுத்த ஆண்டு இறுதிக்குள் ஈராக்கில் உள்ள அமெரிக்கப் படைகள் அனைத்தும் முற்றிலும் வாபஸ் பெறப்பட்டு விடும் என, ஒபாமா அரசு உறுதி அளித்துள்ளது.

இந்த வாக்குறுதியின் ஒரு கட்டமாக நேற்று முதல், ஈராக்கில் தாக்குதல் நடவடிக்கையில் ஈடுபடுவதை அமெரிக்க படைகள் நிறுத்தி கொண்டன.

தற்போது ஈராக்கில் தங்கியுள்ள அமெரிக்கப் படைகள், ஈராக் வீரர்களுக்கு பயிற்சி அளிக்கும் பணியில் மட்டுமே ஈடுபடுவார்கள்.இதனிடையே ஈராக்கில் பணி முடித்து டெக்சாஸ் மாநில முகாமுக்கு திரும்பிய ராணு வீரர்களிடையே ஒபாமா நேற்று உரையாற்றினார்.

டைட்டானிக் கப்பலின் புதிய படங்கள் வெளியீடு

Virakesari.
கடலில் மூழ்கிப் போய் விட்ட டைட்டானிக் கப்பலின் புதிய படங்கள் கிடைத்துள்ளன. மிகத் துல்லியமான இந்தப் படங்கள் சிலிர்க்க வைப்பதாக உள்ளது.

உலக மக்களால் மறக்க முடியாத பெயர் டைட்டானிக். 1912ம் ஆண்டு 1500பேருக்கும் மேற்பட்ட சுற்றுலாப் பயணிகளுடன் அன்டார்க்டிக் கடலில் சென்று கொண்டிருந்த உலகின் புகழ் பெற்ற சொகுசுக் கப்பலான டைட்டானிக், பெரிய ஐஸ் மலையில் மோதி கடலில் மூழ்கியது.

அதுதான் பிரமாண்டமான டைட்டானிக்கின் முதல் சொகுசுப் பயணமாகும். கடலில் மூழ்கியதில் அதில் இருந்த அத்தனை பேருமே ஜல சமாதி அடைந்தனர்.

மூழ்கிப் போய்விட்ட கப்பலை இதுவரை மீட்க முடியவில்லை. அவ்வப்போது டைட்டானிக்கை அடையும் அகழ்வுப் பணிகள் நடந்தபடி உள்ளது. கடல் மட்டத்திலிருந்து நான்கு கிலோ மீட்டர் ஆழத்தில் டைட்டானிக் புதைந்து கிடக்கிறது.

தற்போது கனடாவைச் சேர்ந்த ஒரு குழு டைட்டானிக் குறித்த புதிய புகைப்படங்களையும், வீடியோவையும் வெளியிட்டு சிலிர்க்க வைத்துள்ளது. இதுவரை இல்லாத மிகத் துல்லியமாக உள்ளன இந்தப் படங்கள். ரோபோட் மூலம் இந்தப் புகைப்

படங்கள் அதி நவீன தொழில் நுட்பத்தைப் பயன்படுத்தி எடுக்கப்பட்டுள்ளன. ஆகஸ்ட் 28-ம்தேதி இந்தப் படங்களை பிரீமியர் எக்ஸிபிஷன்ஸ் நிறுவனம் வெளியிட்டுள்ளது.

அதில் டைட்டானிக் கப்பலின் முகப்புப் பகுதியின் மேல் பகுதி தெளிவாக தெரிகிறது. முகப்புப் பகுதியின் மேல் பகுதியில் உள்ள தடுப்புக் கம்பி உள்ளிட்டவை அப்படியே இருக்கிறது. கப்பலில் பொருத்தப்பட்டிருந்த நங்கூரம்கூட அப்படியே காணப்படுகிறது.

இமேஜிங் டெக்னாலஜி மற்றும் சோனார் சாதனங்கள் மூலம் இந்தப் புகைப்படங்களையும், வீடியோவையும் எடுத்துள்ளது கனடிய குழு. டைட்டானிக் கண்டுபிடிப்பு முயற்சியில் முதல் முறையாக இந்த தொழில் நுட்பம் பயன்படுத்தப்பட்டுள்ளது குறிப்பிடத்தக்கது.

ஆர்.எம்.எஸ். டைட்டானிக் நிறுவனத்துடன் இணைந்து இந்த ஆய்வை கனடிய நிறுவனம் மேற்கொண்டுள்ளது. ஆர்.எம்.எஸ். டைட்டானிக் நிறுவனத்திடம்தான் புதைந்து போயுள்ள டைட்டானிக் கப்பலின் உரிமை உள்ளது குறிப்பிடத்தக்கது.

புதைந்து போயுள்ள டைட்டானிக் கப்பலிலிருந்து எதையாவது கண்டுபிடித்தால் அதை இந்த நிறுவனத்திடம்தான் ஒப்படைக்க வேண்டும் என்பதும் குறிப்பிடத்தக்கது.

தற்போது கடல் பகுதியில் டேனியல் என்ற புயல் வீசிக் கொண்டிருப்பதால், வானிலை மோசமடைந்துள்ளது. இதனால் ஆய்வுக் குழு கனடாவில் உள்ள நியூபவுன்லேன்ட்டுக்குத் திரும்புவதாக அறிவித்துள்ளது. கடல் அமைதி அடைந்ததும் மீண்டும் அகழ்வாராய்ச்சி தொடரும் எனஅறிவிக்கப்பட்டுள்ளது.

டைட்டானிக் படத்தை எடுத்த இயக்குநர் ஜேம்ஸ் கேமரூனும்கூட படத்தை எடுப்பதற்கு முன்பு நேரடியாக அகழ்வாராய்ச்சியில் இறங்கி டைட்டானிக்கின் மேல் பக்கம் உள்ளிட்டவற்றை புகைப்படம் எடுத்து வந்தார் என்பது நினைவிருக்கலாம்.

கடைசியாக கடந்த 2004-ம் ஆண்டுதான் டைட்டானிக் குறித்த அகழ்வாராய்ச்சி நடந்தது.

ஒசாமா பின்லேடன் ஜோர்ஜ் புஷ்ஷால் நியமிக்கப்பட்ட சி.ஐ.ஏ ஏஜென்ட்: காஸ்ட்ரோ

Virakesari.
ஜோர்ஜ் புஷ் அதிபராக இருந்த காலத்தில் அவரால் சிஐஏ ஏஜென்ட்டாக நியமிக்கப்பட்டவர்தான் ஒசாமா பின் லேடன். இது விக்கிலீக்ஸ் வெளியிட்டுள்ள ஆவணங்கள் உறுதிப்படுத்துகின்றன என்று கியூப தலைவர் பிடல் காஸ்ட்ரோ தெரிவித்துள்ளார்.

லிதுவேனியாவைச் சேர்ந்த எழுத்தாளர் காஸ்ட்ரோவை சந்தித்தார். அப்போது உடன் இருந்த பத்திரிக்கையாளர்களிடம் காஸ்ட்ரோ பேசுகையில்,

சிஐஏவால் பணம் கொடுத்து விலைக்கு வாங்கப்பட்டவர்தான் பின் லேடன். ஜோர்ஜ் புஷ் அதிபராக இருந்தபோது அவருக்கு சாதகமாக நடந்து கொள்ளவே பின் லேடனை விலைக்கு வாங்கியது சிஐஏ. உலகம் முழுவதையும் பயமுறுத்திக் கொண்டே இருக்க வேண்டும் என்பதுதான் புஷ்ஷின் பிரதான எண்ணம். அதற்கு வசதியாக அவர்கள் லேடனை பயன்படுத்திக் கொண்டார்.

தான் அடுத்து என்ன செய்யப் போகிறேன் என்பதை பின்லேடன் அறிவிப்பார். அவரைத் தொடர்ந்து புஷ் எச்சரிக்கும் வகையில் பேசுவார். இரண்டுமே திட்டமிட்ட நாடகங்கள். புஷ்ஷுக்கு எப்போதுமே ஆதரவாக இருந்தவர் லேடன். புஷ்ஷுக்குக் கீழ்ப்பட்டவராகவே அவர் இருந்து வந்தார்.

லேடன் ஒரு சிஐஏ ஏஜென்ட் என்பது ஆப்கன் போர் ரகசியம் குறித்து விக்கிலீக்ஸ் வெளியிட்டுள்ள ஆவணங்கள் அம்பலப்படுத்துகின்றன என்றார் காஸ்ட்ரோ.

84 வயதாகும் காஸ்ட்ரோ சில காலமாக உடல் நலம் குன்றியிருந்தார். தற்போது அவர் நலமடைந்து செய்தியாளர்களைச் சந்திக்க ஆரம்பித்துள்ளார். பல்வேறு நிகழ்ச்சிக்களுக்கும் போக ஆரம்பித்துள்ளார். வழக்கமான முறையில் செயல்பட ஆரம்பித்தது முதல் பரபரப்பு பேச்சாக பேசி வருகிறார் காஸ்ட்ரோ.

ஈரானை அமெரிக்கா தாக்கினால் அணு ஆயுத யுத்தம் வரும் என்று சமீபத்தில் அவர் எச்சரிக்கை விடுத்திருந்தார்.

இந்த நிலையில் ஒசாமா பின்லேடன்,அமெரிக்காவின் ஏஜென்ட் என அவர் கூறியிருப்பது பரபரப்பை ஏற்படுத்தியுள்ளது.

இந்தோனேசியாவில் எரிமலைக் குமுறல்

Virakesari.
இந்தோனேசியாவின் தீவுப் பகுதியான சுமாத்ராவில் உள்ள எரிமலைக்குழம்பிலிருந்து பெருமளவிலான அக்கினிக் குழம்புகள் வெளியேறுவதன் காரணமாக 1000 இற்கும் அதிகமான இந்தோனேசிய மக்கள் அப்பகுதியிலிருந்து வெளியேறியுள்ளனர்.

‘சினபங் என்ற இவ் எரிமலை 1,500 மீற்றர் உயரத்திற்கு நேற்று நடுநிசியில் வெடித்துள்ளது.400 வருடங்களுக்கு பிறகே சினபங் எரிமலை வெடித்துள்ளது’ என இந்தோனேசியாவின் அனர்த்த முகாமைத்துவ முகவர்நிலையம் தெரிவித்தது.

தேசிய அனர்த்த முன்னெச்சரிக்கை நிலையம் இது குறித்து தெரிவிக்கையில்,

‘ எரிமலை வெடிப்பு முன்னெச்சரிக்கை அளவானது அதிகரித்தவண்ணம் உள்ளது. எரிமலையிலிருந்து வெளியேறும் புகையின் அளவு அதிகரித்துள்ளது. இந்நிலை ஆபத்தானதாக உள்ளது’ எனத் தெரிவித்தார்.

பெண்ணின் வயிற்றில் 22 கிலோ எடையுள்ள கட்டி

Virakesari.
ஆர்ஜென்டினாவில் ஒரு பெண்ணின் வயிற்றிலிருந்து 22 கிலோ எடையுள்ள கட்டி அகற்றப்பட்டது. இது உலகிலேயே மனித உடலில் இருந்து அகற்றப்பட்ட மிகப்பெரிய கட்டி என டாக்டர்கள் தெரிவித்தனர். இங்கிலாந்தில் உள்ள லோமாஸ்டி ஷமோரா என்ற நகரை சேர்ந்த 54 வயதான பெண்மணியின் வயிற்றிலிருந்தே இவ்வாறு பாரிய கட்டி இருப்பது கண்டுபிடிக்கப்பட்டு அகற்றப்பட்டது.

இவர் 18 மாதங்களாக வயிற்று வலியால் அவதிப்பட்டு வந்தார். அவரது வயிறு நாளுக்கு நாள் பெரிதாகிக் கொண்டே இருந்தது.

ஆர்ஜென்டினாவில் உள்ள பியூனோஸ் எர்ஸ் என்ற இடத்தில் உள்ள வைத்தியசாலையில் இவர் அனுமதிக்கப்பட்டார். 'ஸ்கேன்' செய்து பார்த்ததில் அவரது வயிற்றில் ஒரு கட்டி வளர்ந்திருப்பது தெரிய வந்தது. உடனே அவருக்கு டாக்டர்கள் சத்திர சிகிச்சை செய்தனர். சுமார் 4 மணி நேரம் நடந்த சத்திரசிகிச்சை முடிவில் அப்பெண்ணின் வயிற்றிலிருந்து 22 கிலோ எடையுள்ள கட்டி அகற்றப்பட்டது.

இது உலகிலேயே மனித உடலில் இருந்து அகற்றப்பட்ட மிகப்பெரிய கட்டி என டாக்டர்கள் தெரிவித்தனர்.

மனித உடலில் இருந்து இதுவரை அதிக பட்சமாக 4.3 கிலோ எடையுள்ள நோய்க் கட்டிதான் அகற்றப்பட்டுள்ளது. இது கற்பனை செய்து பார்க்க முடியாத அளவு மிகப்பெரியது என 34 வருட அனுபவம் வாய்ந்த டாக்டர் ஆஸ்கார் லோபெஷ் தெரிவித்துள்ளார்.

சீனாவின் நவீன 'ஸ்ட்ரட்லிங் பஸ்'

Virakesari.
போக்குவரத்து நெரிசல் என்பது வளர்ச்சியடைந்த நாடுகள் தற்போது எதிர்நோக்கும் பாரிய பிரச்சினையாகும்.

வீதிப் போக்குவரத்து நெரிசலைக் குறைப்பதற்கும் பயணிகள் மற்றும் வாகனங்களின் வசதி கருதியும் நவீன பயணிகள் பஸ் ஒன்றினை சீனா அடுத்த வருடமளவில் பரீட்சார்த்தமாக வெள்ளோட்டமிடவுள்ளது.

சீனாவின் தலைநகரான சனத்தொகை நெரிசல் மிக்க பீஜிங் நகரிலேயே இது பரீட்சிக்கப்படவுள்ளது.

மேற்படி பஸ்ஸின் கீழ்ப்பாகம் அகன்று விரிந்த நிலையில் அமைக்கப்பட்டுள்ளது. இதன் காரணமாக இதற்கு கீழாகவுள்ள இடைவெளியில் கார்கள் மற்றும் 1.55 முதல் 1.6 மீற்றர் வரை உயரம் கொண்ட வாகனங்கள் பயணிக்க முடியும்.

இது 'ஸ்ட்ரட்லிங் பஸ்' என அழைக்கப்படுகின்றது.

இந்நவீன பஸ், கடந்த மே மாதம் சீனாவில் இடம்பெற்ற சர்வதேச 'ஐ-டெக் எக்ஸ்போ' கண்காட்சியில் பார்வைக்கு வைக்கப்பட்டிருந்தது.

சூரிய சக்தி மற்றும் மின்சாரத்தின் மூலம் இது இயங்குகின்றது. இதற்கான விசேட உபகரணங்கள் இதில் பொருத்தப்பட்டுள்ளன.

இதன் மேற்பாகத்தில் சுமார் 1200 முதல் 1400 பேர் வரை பயணிக்கலாம்.

மேலும் இதனுள் சூரிய ஒளி அதிகளவில் உட்புகுவதால் பயணிகள் தங்கள் மன உளைச்சலில் இருந்தும் விடுபட முடியுமென தெரிவிக்கப்படுகின்றது.

விபத்தொன்று ஏற்படின் அதிலிருந்து தப்புவதற்காக விமானங்களில் கடைப்பிடிக்கப்படும் நடைமுறையே இதிலும் பின்பற்றப்படவுள்ளது.

பெரிய அளவிலான வாகனங்கள் இதன் கீழ் பகுதியினுள் நுழையாமல் தடுப்பதற்காக விசேட சமிக்ஞைகளும் பொருத்தப்பட்டுள்ளன.

இது பாவனைக்கு வருமிடத்து, வீதி நெரிசல் பெருமளவில் குறையுமென சீன போக்குவரத்து அதிகாரிகள் கருத்து தெரிவிக்கின்றனர்.

அமெ.தூதரகம் மீது இன்று பாகிஸ்தானில் துப்பாக்கித் தாக்குதல்

Virakesari.
பாகிஸ்தானில் அமெரிக்கத் தூதரகத்தை குறிவைத்து இன்று மர்ம நபர்கள் துப்பாக்கித் தாக்குதல் மேற்கொண்டனர். 4 மணி நேரம் நடந்த துப்பாக்கிச் சூட்டுச் சம்பவம் அங்கு பெரும் பரபரப்பை ஏற்படுத்தியதாகத் தெரிவிக்கப்படுகிறது.

பாகிஸ்தானில் பெஷாவர் நகரில் அமெரிக்க துணைத் தூதரகம் அமைந்துள்ளது. பலத்த பாதுகாப்புடன் கூடிய அந்தப் பகுதியில், துப்பாக்கியுடன் நுழைந்த மர்ம நபர்கள், திடீரென அமெரிக்கத் துணை தூதரகத்தைச் நோக்கி சுட்டனர்.

தூதரகத்தில் பாதுகாப்பு பணியில் ஈடுபட்டிருந்த பொலிசாரும் பதில் தாக்குதல் நடத்தினர்.

4 மணி நேரமாக நடந்த துப்பாக்கிச் சூட்டு சம்பவத்தில் உயிர்சேதம் எதுவும் ஏற்படவில்லை எனத் தகவல்கள் தெரிவிக்கின்றன.

மர்ம நபர்களைப் பிடிக்க பொலிசார் தீவிர தேடுதல் பணியில் ஈடுபட்டுள்ளனர். அமெரிக்கத் தூதரகம் மீது தாக்குதல் நடத்த முயற்சி செய்த சம்பவத்தையடுத்து, அப்பகுதியில் பெரும் பதட்டம் ஏற்பட்டுள்ளது.

பெஷாவர் நகரம் முழுவதும் பலத்த பொலிஸ் பாதுகாப்பு போடப்பட்டுள்ளது

21 நாட்களாக சுரங்கத்தினுள் 33 பேர் தவிப்பு : சிலியில் அவலம்.

Virakesari.
தென் அமெரிக்க சிலி நாட்டின் காபியாபோவிலுள்ள சுரங்கம் ஒன்றில் சிக்கி 21 நாட்களாக 33 தொழிலாளர்கள் இன்னமும் போராடி கொண்டிருக்கின்றனர்.

சுரங்கத்தின் 3 ஆயிரம் அடி ஆழத்தில் தொழிலாளர்கள் பணியில் ஈடுபட்டிருந்த போது, கடந்த 5ஆம் திகதி சுரங்க பாதை திடீரென இடிந்து விழுந்தது. அங்கு கடமையாற்றிக் கொண்டிருந்த 33 தொழிலாளர்கள் அதற்குள் சிக்கிக் கொண்டனர்.

அவர்களை மீட்கும் பணி நடந்தது. 'ட்ரில்' இயந்திரம் மூலம் துளை போட்டு அவர்கள் இருக்கும் இடத்தை 17 நாட்களுக்குப் பிறகு கண்டுபிடித்த போது அவர்கள் அனைவரும் உயிரோடு இருப்பது தெரிய வந்தது.

சிறிய அளவிலேயே இந்தத் துளை போடப்பட்டுள்ளதால், அதன் வழியாக அவர்களை மீட்க முடியவில்லை. எனினும் தகவல் தொடர்பு, வெளிச்சம் வசதிகள் அதன் மூலம் ஏற்படுத்திக்கொடுக்கப்பட்டுள்ளன. அதன் வழியாக குளுக்கோஸ் மற்றும் மாத்திரைகள் போன்றவை அனுப்பப்பட்டு வருகின்றன.

21 நாட்களாக அவர்கள் உயிருக்குப் போராடிக் கொண்டிருக்கின்றனர். அவர்களை மீட்பதற்கு இன்னும் ஒரு மாதம் வரை ஆகலாம் என்று மீட்புக் குழுவினர் தெரிவிக்கின்றனர்.

அதுவரை அவர்கள் உயிரோடு இருக்க வேண்டும் என்பதற்காக மிக அத்தியாவசியமான பொருட்களை மட்டும் சுரங்க குழாய் வழியாக அனுப்பி வருகின்றனர்.

இதற்கிடையே அந்த பகுதியில் அடிக்கடி பூகம்பமும் ஏற்பட்டு வருகிறது. விபத்து நடந்ததற்கு பிறகு இரு தடவை பூகம்பம் ஏற்பட்டுள்ளது. இதனால் சுரங்கம் மேலும் இடிந்து அவர்களுக்கு ஆபத்து ஏற்பட்டு விடுமோ என்ற அச்சம் நிலவுகிறது.

ஹிட்லர் மூதாதையர்கள் ஆப்ரிக்கர்களா ? புதிய சர்ச்சை

Virakesari.
நாசி கொள்கை கொண்ட சர்வாதிகாரி ஹிட்லரின் மூதாதையர்கள் ஆப்ரிக்கர்களாக இருக்கக் கூடும் என ஒரு ஆய்வு அறிக்கையில் குறிப்பிடப்பட்டுள்ளது. ஹிட்லர் யூத இனத்தைச் சேர்ந்தவர் என நம்பப்படுகிறது.

ஹிட்லரின் நெருங்கிய உறவினர்கள் 39 பேரது உமிழ் நீர் மாதிரி‌களை எடுத்து அவற்றை டி.என்.ஏ., பரிசோதனைக்கு உட்படுத்திய போது அவரது மூதாதையர்களில் சீலர் வடக்கு ஆப்ரிக்கா, மொராக்கோவைச் சேர்ந்த பெர்பெர் இனத்தவராக இருக்கக் கூடும் என கூறப்பட்டுள்ளது.

பெர்பர் இனத்தை ஹிட்லர் மிகவும் வெறுத்தார் என்பதும், அவர்களை அழித்தே தீருவேன் என கங்கனம் கட்டியிருந்தார் என்பதும் குறிப்பிடத்தக்கது. லண்டனைச் சேர்ந்தவர் நடத்தியுள்ள இந்த ஆய்வு பெரும் பரபரப்பை ஏற்படுத்தியுள்ளது.

நேபாளத்தில் விமான விபத்து; 14 பேர் பலி

Virakesari.
நேபாளத்தில் இடம்பெற்ற விமான விபத்தொன்றில் 14 பேர் பலியாகியிருக்கலாம் எனத் தெரிவிக்கப்படுகிது. மோசமான வானிலையே இவ்விபத்துக்கு காரணம்.

நேபாளத்தின் கிழக்குப் பிராந்தியமான லுக்லாவிற்குச் சென்ற விமானம் மோசமான காலநிலை காரணமாக அங்கு தரையிறங்க முடியாமல் தலைநகர் கத்மண்டுவுக்கு திரும்பிவந்து கொண்டிருந்த போது இவ்விபத்து இடம்பெற்றுள்ளது.

இச்சிறிய விமானத்தில் 11 பயணிகளும் 3 விமான உத்தியோகஸ்தர்களும் இருந்தனர். பலியானவர்களில் 6 பேர் வெளிநாட்டவர்கள் எனத் தெரிவிக்கப்படுகிறது.

வெள்ளப்பெருக்கு காரணமாக, விமானம் விழுந்த இடத்தை மீட்புப் பணியாளர்கள் அடைவது சிரமமாகவுள்ளதாக நேபாள அரசாங்க அதிகாரியொருவர் தெரிவித்துள்ளார்.

ஹெலிகொப்டர்களை அனுப்பியபோதிலும் கடும் மழை காரணமாக விபத்து நடந்த இடத்தை அவை அடையவில்லை என காத்மண்டு விமான நிலைய அதிகாரி திரிரட்ணா மனாதர் கூறியுள்ளார்.

ஒபாமாவின் முன்னால் நிர்வாணமாக தோன்றினால் ஒரு மில்லியன் அமெரிக்க டொலர் பரிசு

Virakesari.
அமெரிக்க ஜனாதிபதி பராக் ஒபாமாவின் முன்னால் எவரேனும் நிர்வாணமாக தோன்றினால், அந்நபருக்கு ஒரு மில்லியன் அமெரிக்க டொலர்களை பரிசாக வழங்கத் தயாரென பிரிட்டனைச் சேர்ந்த கோடீஸ்வரர் ஒருவர் அறிவித்துள்ளார்.

அல்கி டேவிட் என்பவர் பிரித்தானிய பத்திரிகையொன்று வெளியிட்ட பெரும்பணக்காரர்கள் பட்டியலில் 45 ஆவது இடத்தில் உள்ளார். அவரிடம் இருக்கும் சொத்துக்களின் பெறுமதி 1.15 பில்லியன் ஸ்ரேலிங் பவுண்கள்; எனத் தெரிவிக்கப்படுகிறது.

அவர் நிர்வாணமாக ஒபாமாவின் முன்னால் தோன்றுபவர்களுக்கு 10 லட்சம் டொலர் பரிசளிப்பதாக உறுதியளித்துள்ளார்.

புதிய இணையத்தளம் ஒன்றுக்கான பிரச்சாரமாக இந்த விபரீதமான பரிசுத்திட்டம் அறிவிக்கப்பட்டுள்ளது.

நைஜீரியாவைப் பிறப்பிடமாகக் கொண்ட தொழிலதிபரான 42 வயதான அல்கி டேவிட், எனும் இணையத்தளத்தை உருவாக்கியுள்ளார்.

இந்த இணையத்தளம் வேடிக்கையான செயல்களுக்காக மக்களுக்கு ஆயிரக்கணக்கான ஸ்ரேலிங் பவுண்களை பரிசாக வழங்கி; வருகிறது. இச்செயற்பாடுகள் இணையத்தளத்தில் நேரடியாக ஒளிபரப்பப்படுகின்றன.

நடிகராகவும் விளங்கும் அல்கி டேவிட், ஒபாமாவின் முன் நிர்வாணமாக தோன்றுபவர்களுக்கு ஒரு லட்சம் டொலர் வழங்குவதாக முதலில் அறிவித்ததாக டெய்லி டெலிகிராவ் பத்திரிகை செய்தி வெளியிட்டது.

எனினும், பின்னர் இந்த துணிச்சல் மிகுந்த வேடிக்கைக்கு இப்பணம் போதுமானது அல்ல என்று அவர் கூறியுள்ளதுடன் அத்தொகையை ஒரு மில்லியன் டொலராக அதிகரித்துள்ளார்.

ஒபாமாவின் முன்னால் நிர்வாணமாகத் தோன்றி பரிசு பெற விரும்பும் நபர் தனது வயிற்றில் மேற்படி இணையத்தளத்தின் பெயரை எழுதியிருக்க வேண்டும் என நிபந்தனை விதிக்கப்பட்டுள்ளது.

இத்திட்டத்தின் மூலம் மக்களை தான் கோபமூட்டுகிறார் என்ற கருத்தை அல்கி டேவிட் நிராகரித்துள்ளார்.

'இரகசியப் பாதுகாப்புச் சேவைப் பிரிவினர் என்னை அப்புறப்படுத்திக்கொண்டு வெள்ளை மாளிகையின் துவிச்சக்கரவண்டி தரிப்பிடத்தின் பின்னால் வைத்திருப்பது போல் எண்ணிப் பார்த்தேன். ஆனால் எல்லாமே வேடிக்கைதான்' என்கிறார் அவர்.

சிலி சுரங்க விபத்து:17 பேர் உயிருடன் இருப்பதாகத் தகவல்

Virakesari.

லி நாட்டில் கடந்த இருவாரங்களுக்கு முன்னர் ஏற்பட்ட நிலக்கரி சுரங்க விபத்தில் சிக்கிய 33 பேரும் உயிருடன் இருப்பதாக அந்நாட்டுத் தகவல்கள் தெரிவிக்கின்றன.

நிலத்துக்குக் கீழ் சுமார் 700 மீற்றர் ஆழத்தில் பணியாற்றிய சுரங்கத் தொழிலாளர்கள், அங்கு இடம்பெற்ற விபத்தில் சிக்கிக் கொண்டனர். அவர்களிடமிருந்து எந்தவிதமான தகவலும் வெளியாகாத நிலையில், அவர்கள் இறந்துவிட்டதாகக் கருதப்பட்டது.

நேற்றைய தினம் மீட்புப் பணியாளர்களினால் அனுப்பப்பட்ட ஒலிப்பதிவு கருவி, தொழிலாளர்கள் உயிருடன் இருப்பது பதிவாகியுள்ளது.

நிலத்துக்கு அடியில் உள்ள 33 பேரும் நலமாக இருப்பதாக தெரிவிக்கப்பட்ட குறிப்பு ஒன்றும் அந்த கருவியுடன் இணைக்கப்பட்டு வந்துள்ளது.

இவர்களை மீட்க மேலும் சில மாதங்களேனும் தேவைப்படும் என மீட்புப் பணியாளர்கள் தெரிவித்துள்ளனர்.

ஒபாமா கிறிஸ்தவ மதத்தைச் சேர்ந்தவர் : வெள்ளை மாளிகை விளக்கம்

Virakesari.
அமெரிக்க அதிபர் பராக் ஒபாமா கிறிஸ்தவ மதத்தைச் சேர்ந்தவர் என்பதில் எந்த்விதச் சந்தேகமும் இல்லை என வெள்ளை மாளிகை உறுதிபட தெரிவித்துள்ளது.

வெள்ளை மாளிகையின் ஊடகப் பிரிவு துணைச் செயலர் பில் பர்டன் இது குறித்து விளக்கமளித்துள்ளார்.

அமெரிக்க அதிபர் எந்த மதத்தைச் சேர்ந்தவர் என்பது குறித்து மக்களிடையே சந்தேகம் நிலவி வந்தது. இதுகுறித்து அண்மையில் ஒரு கருத்துக் கணிப்பு நடத்தப்பட்டது.

அதில், 18 சதவீத அமெரிக்கர்கள், ஒபாமா முஸ்லிம் மதத்தைச் சேர்ந்தவர் என்று தெரிவித்தனர். 34 சதவீதம் பேர், ஒபாமா கிறிஸ்தவர் என்று தெரிவித்தனர். 43 சதவீதம் பேர், அவர் எந்த மதத்தைச் சேர்ந்தவர் என்பது தெரியவில்லை என்று கூறினர்.

கடந்த ஆண்டு மார்ச் மாதம் எடுக்கப்பட்ட கருத்துக் கணிப்பின் போது, 11 சதவீதம் பேர் ஒபாமா முஸ்லிம் என்றும், 48 சதவீதம் பேர் அவர் கிறிஸ்தவர் என்றும் தெரிவித்திருந்தனர்.

இதனையடுத்து, ஒபாமா கிறிஸ்தவ மதத்தைச் சேர்ந்தவர்தான் என்று வெள்ளை மாளிகை உறுதி அளித்துள்ளது.

இதுகுறித்து, வெள்ளை மாளிகையின் ஊடகப் பிரிவு துணைச் செயலர் பில் பர்டன் கூறுகையில்,

"பெரும்பாலான அமெரிக்கர்கள் பொருளாதாரம் சீரடையுமா, ஈரான், ஆப்கானிஸ்தான் போர் எந்த நிலையில் உள்ளது என்பன குறித்து யோசித்துக் கொண்டிருக்கின்றனர். சிலர், ஒபாமா எந்த மதத்தைச் சேர்ந்தவர் என்று ஆராய்ந்து கொண்டிருக்கின்றனர்.

இது தேவையற்ற வேலை. இருப்பினும், ஒபாமா எந்த மதத்தைச் சேர்ந்தவர் என்பதை தெரிந்துகொள்ள பலர் ஆர்வமாக இருப்பதால், அதை தெளிவுபடுத்த வேண்டியது எங்கள் கடமை.

அதிபர் ஒபாமா நிச்சயமாக ஒரு கிறிஸ்தவர்தான். அவர் தினமும் பிரார்த்தனை செய்கிறார். போதகர்களைச் சந்தித்து ஆன்மிகம் தொடர்பாக உரையாடுகிறார். அவர்களது வழிகாட்டுதல்களையும், ஆலோசனைகளையும் பெற்றுக் கொள்கிறார்.

மதம் தொடர்பான அவரது நம்பிக்கைகள் அவரது தனிப்பட்ட விவகாரம். அதை விவாதப் பொருளாக மாற்ற வேண்டியதில்லை.

நாட்டில், எவ்வளவோ பிரச்சினைகள் இருக்கின்றன. மக்கள் அதில், கவனம் செலுத்த வேண்டும்.

நாட்டில் பொருளாதாரத்தை சீரமைப்பது, வேலைவாய்ப்புகளை உருவாக்குவது போன்ற பணிகளில் ஒபாமா கவனம் செலுத்தி வருகிறார்" என்றார்.

90ஆவது பிறந்த தினத்தன்று பரசூட்டில் குதித்து ஒருவர் சாதனை

Virakesari.

90ஆவது பிறந்த தினத்தன்று 1000 மீட்டர் உயரத்திலிருந்து பரசூட்டில்ல் குதித்து சாதனை படைத்துளார் ஒருவர்.

ஆர்ஜென்டினாவைச் சேர்ந்த கார்லோஸ் ரோகு பெல்ட்ரான் (90) என்பவரே இந்தச் சாதனையைப் புரிந்துள்ளார்.

இவர் ஆர்ஜென்டினாவில் நடந்த சுதந்திர போராட்டத்தில் பங்குபெற்றவர். மேலும் அந்நாட்டு இராணுவத்தில் உள்ள பரசூட் வீரர்கள் குழுவிலும் இவர் இடம்பெற்றிருந்தார்.

இவர் தனது 90ஆவது பிறந்த நாளை சமீபத்தில் கொண்டாடினார். அன்று விமானத்தில் பறந்தபடி 1000 மீட்டர் உயரத்தில் இருந்து பரசூட் மூலம் குதிக்கத் திட்டமிட்டார். அதன்படி அவர் பரசூட்டில் இருந்து குதித்து சாதனை படைத்தார்.

இது தனது வாழ்க்கையில் மிகவும் வியக்கத்தக்க பிரமாண்டமான நாள் என்று அவர் தெரிவித்தார். அவர் தனது வாழ்நாளில் இதுவரை 1200 தடவை பரசூட்டிலிருந்து குதித்துள்ளார்.

ஈராக்கிலிருந்து கடைசி அமெ. படைப்பிரிவும் வெளியேற்றம்

Virakesari.
ஈராக்கிலிருந்து அமெரிக்க இராணுவத்தின் கடைசி தாக்குதல் படைப்பிரிவும் நேற்று வெளியேறியது.

ஈராக்கில், சதாம் உசேன் ஆட்சி அகற்றப்பட்டபின், அமெரிக்க படைகள் அங்கு குவிக்கப்பட்டன. அமெரிக்க இராணுவம் ஈராக்கிலிருந்து வெளியேற வேண்டும் என, பல்வேறு தரப்பிலும் இருந்து நெருக்கடி எழுந்தது.

இந்நிலையில், அமெரிக்க அதிபராக ஒபாமா பதவியேற்றபின், ஈராக்கில் உள்ள அமெரிக்கப் படைகள் அனைத்தும், 2010 ஆகஸ்ட் 31க்குள் முழுமையாக வாபஸ் பெறப்படும் என, அறிவித்தார். இதன்படி, ஈராக்கிலிருந்த அமெரிக்க படைகள் படிப்படியாக வெளியேறின.

அமெரிக்க இராணுவத்தின் நான்காவது ஸ்ட்ரைக்கர் பிரிகேட், இரண்டாவது இன்பன்ட்ரி டிவிஷன் ஆகிய கடைசி தாக்குதல் படைப் பிரிவுகள் நேற்று காலை வெளியேறின. குவைத் வழியாக இந்த படைப்பிரிவினர் நேற்று வெளியேறினர்.

தாங்கள் தற்போது நிம்மதி அடைந்துள்ளதாக அவர்கள் தெரிவித்தனர். அமெரிக்க இராணுவத்தின் தாக்குதல் படைப் பிரிவினர் வெளியேறினாலும், வேறு சில பிரிவுகளைச் சேர்ந்த 50 ஆயிரம் வீரர்கள் அங்கு தொடர்ந்து தங்கியுள்ளனர்.

ஈராக் இராணுவத்துக்கு ஆலோசனை கூறுவதற்காகவும், அமெரிக்காவின் நலன் கருதியும் இந்த படைப் பிரிவினர் அடுத்தாண்டு இறுதி வரை அங்கு இருப்பர் என, தெரிவிக்கப்பட்டுள்ளது.

இவர்கள் வசம் ஆயுதங்கள் இருந்தாலும், சுய பாதுகாப்புக்காக மட்டுமே அவற்றை அவர்கள் பயன்படுத்துவர் என்று அமெரிக்கா தரப்பில் தெரிவிக்கப்பட்டுள்ளது.

ஏழு ஆண்டுகளுக்கும் மேலாக அமெரிக்க இராணுவம், ஈராக்கில் முகாமிட்டிருந்தமை குறிப்பிடத்தக்கது.

தங்கத்தில் ஒக்டோபஸ் : கொல்கொத்தா நிறுவனம் உருவாக்கம்

Virakesari.
உலகக் கிண்ண உதைபந்தாட்டப் போட்டியின் போது உலகப் புகழ்பெற்ற ஒக்டோபசை கொல்கத்த்தாவைச் சேர்ந்த நிறுவனம் ஒன்று தங்கத்தில் உருவாக்கியுள்ளது.

அண்மையில் நடந்து முடிந்த உலகக் கிண்ண உதைபந்தாட்டப் போட்டியின் போது, இறுதி முடிவை ஜெர்மனி மியூசியத்தில் இருந்த 'போல்' எனும் ஒக்டோபஸ் முன்கூட்டியே கணித்துக் கூறியது. இதன் மூலம் 'போல்' உலகம் முழுவதும் பிரபலமாகியது.

போட்டி முடிந்த பின்னர் அதன் உரிமையாளர் 'போல்' ஓய்வு பெற்று விட்டதாகவும், இனிமேல் எந்த முடிவையும் அது கணிக்காது என்றும் அறிவித்தார்.

இந்நிலையில் ஒக்டோபசின் உருவத்தை கொல்கொத்தாவைச் சேர்ந்த நிறுவனம் ஒன்று தங்கத்தில் வடித்துள்ளது. 22 கெரட் தங்கத்தில் செதுக்கப்பட்டுள்ள இதன் மொத்த எடை 3.3 கிலோவாகும்.

30 கலைஞர்கள் இணைந்து இதனை உருவாக்கியுள்ளனர். இதன் விலை 80 லட்ச ரூபா என மதிப்பிடப்படுகிறது.

எச்-1பி' -'எல்-1' விசா கட்டணத்தை அதிகரிக்க அமெரிக்கா திட்டம்

Virakesari.
எச்-1பி' மற்றும் 'எல்-1' விசா கட்டணத்தை அதிகரிக்க அமெரிக்கா திட்டமிட்டுள்ளது. இதனால், ஏராளமான இந்திய முன்னணி கம்பெனிகள் பாதிக்கப்படும் அபாயம் உருவாகியுள்ளது.

அமெரிக்காவில் வேலைக்கு செல்வோருக்காக ஆண்டுதோறும், 'எச்-1பி மற்றும் எல்-1' விசாக்கள் வழங்கப்படுகின்றன. இந்திய கம்பெனிகள், குறிப்பாக தகவல் தொழில்நுட்ப நிறுவனங்கள் தான், ஒவ்வொரு ஆண்டும் இதுபோன்ற 50 ஆயிரம் விசாக்களை விண்ணப்பித்து வாங்குகின்றன.

ஏற்கனவே உள்ள இந்த வகை விசாக்களை புதுப்பிப்பதோடு, புதிதாகவும் வாங்குகின்றன.

இந்நிலையில், இந்த வகை விசா கட்டணங்களை அதிகரிக்க அமெரிக்கா திட்டமிட்டுள்ளது. குறைந்தபட்சம் ஒரு லட்சம் ரூபாவரை உயர்த்த அமெரிக்கா முடிவு செய்துள்ளது. இந்தக் கட்டண உயர்வு, ஐந்து ஆண்டுகளுக்கு அமுலில் இருக்கும். இதன்மூலம், 2,750 கோடி ரூபா திரட்டவும் தீர்மானித்துள்ளது.

அமெரிக்கா - மெக்சிகோ எல்லைப் பகுதியில் பாதுகாப்பை அதிகரிக்க அமெரிக்கா, 3,250 கோடி ரூபா ஒதுக்கியுள்ளது. அதில், பெரும்பகுதியை விசா கட்டணத்தை அதிகரிப்பதன் மூலம் பெறவும் முடிவெடுத்துள்ளது. ஐம்பதுக்கும் மேற்பட்ட தொழிலாளர்கள் பணிபுரியும் நிறுவனங்களுக்கு மட்டுமே இந்த விசா கட்டண உயர்வு பொருந்தும்.

அமெரிக்கா குறிப்பிட்ட இந்திய கம்பெனிகளில் டாடா, விப்ரோ, இன்போசிஸ் மற்றும் சத்யம் அடங்கும். தங்களது பணியாளர்கள், அமெரிக்காவில் தொழில்நுட்ப பணியாற்ற அதிக அளவில் எச்-1 பி மற்றும் எல்.1 விசா வாங்குகின்றனர் என்று குறிப்பிட்டிருக்கிறது.

'நாஸ்காம்' அமைப்பு தகவல்படி ஆண்டு தோறும் இக்கம்பெனிகள் மூலம் 50 ஆயிரம் பேர் விசா கேட்டு விண்ணப்பிப்பதாக கூறப்பட்டிருக்கிறது. இந்த விசா கட்டண உயர்வுக்கு கடும் எதிர்ப்புத் தெரிவித்துள்ள இந்திய அரசு, இந்த விவகாரத்தை உலக வர்த்தக அமைப்பின் கவனத்திற்கு கொண்டு செல்ல தீர்மானித்துள்ளது.

இந்நிலையில், விசா கட்டண உயர்வு இந்திய கம்பெனிகளையும், இந்தியர்களையும் பெரிதும் பாதிக்கும் என்பதை அமெரிக்கா ஒப்புக் கொண்டுள்ளது. அதை குறைக்க நடவடிக்கை எடுக்கப்படும் என்றும் கூறியுள்ளது.

எனினும், இந்தக் கட்டண உயர்வால், இந்தியாவுடனான நீண்ட கால பொருளாதார பங்களிப்பு மற்றும் உறவு பாதிக்கப்படாது. அதற்கு மாறாக பலமடையும் என்றும் அமெரிக்க வெளியுறவு அமைச்சக தகவல் தொடர்பாளர் மார்க் டோனர் கூறியுள்ளார்.

பாக். வெள்ளப் பெருக்கு : மீட்புப் பணிகள் மந்தகெதியில்

virakesari.
பாகிஸ்தானில் சிந்து நதியில் ஏற்பட்ட வெள்ள பெருக்கு கரைகளை உடைத்து கொண்டு பல்வேறு கிராமங்களில் புகுந்துள்ளதால், மீட்பு பணிகள் மந்தகெதியில் நடந்து வருகின்றன.

அத்தியாவசிய உணவு பொருட்களை கொண்டு செல்லும் பணியில் கழுதைகள் ஈடுபடுத்தப்பட்டுள்ளன.பாகிஸ்தானில் கடந்த சில வாரங்களாக பெய்த பலத்த மழையால் சிந்து நதியில் வெள்ளப்பெருக்கு ஏற்பட்டது.

சிந்து மற்றும் பஞ்சாப் மாகாணங்கள் இந்த வெள்ளத்தால் கடுமையாக பாதிக்கப்பட்டுள்ளன. ஏராளமான மலைக் கிராமங்களும் நிலச்சரிவால் பாதிக்கப்பட்டுள்ளன.

பாகிஸ்தானில் இராணுவ ஆட்சி நடந்த போது, மீட்பு பணியில் இராணுவத்தினர் முழு வீச்சில் இறக்கப்பட்டனர். தற்போது ஜனநாயக ஆட்சி நடப்பதால், தலிபான்களை ஒடுக்கும் பணியில் மட்டும் இராணுவத்தினர் ஈடுபட்டுள்ளனர்.

எனவே, மீட்பு பணியில் தொய்வு ஏற்பட்டுள்ளது. சிந்து நதியில் உடைப்பெடுத்து ஏராளமான கிராமங்களில் வெள்ளம் புகுந்துள்ளது. இதனால், ஒரு கோடியே 70 லட்சம் பேர் பாதிக்கப்பட்டுள்ளனர். 20 லட்சம் பேர் வீடுகளை இழந்துள்ளனர்.

பாகிஸ்தான் வரலாற்றில் இது போன்ற வெள்ளத்தை பார்த்ததில்லை என, இங்குள்ள மக்கள் கூறுகின்றனர். பல வாரங்களாக தொடர்ந்து வெள்ளம் கிராமங்களைச் சூழ்ந்துள்ளதால், போதிய சுகாதாரமின்றி, கொலரா போன்ற தொற்று நோய்கள் பரவி வருகின்றன.

வெள்ள பகுதிகளை ஐ.நா., பொதுச்செயலர் பான் கீ மூன் நேற்று முன்தினம் பார்வையிட்டார். கணிசமான நிதி உதவி தேவைப்படுவதாக அவர் குறிப்பிட்டார். வெள்ளத்தில் சிக்கியுள்ளவர்களை மீட்க போதிய அளவு ஹெலிகொப்டர்கள் இல்லை.

எனவே, மழையால் பாதிக்கப்பட்ட மலைப் பகுதிகளுக்குக் கழுதைகள் மூலம் உணவு பொருட்கள் கொண்டு செல்லப்படுகின்றது.

நிலச்சரிவில் சிக்கி காயமடைந்தவர்களை மீட்டு மருத்துவமனைக்கு அழைத்துச் செல்ல போதிய போக்குவரத்து வசதியில்லை. வாகன வசதி முற்றிலும் முடங்கியுள்ளது. எங்கு பார்த்தாலும் மார்பளவு நீரில் மக்கள் நீந்தி செல்லும் நிலைமை காணப்படுகிறது.

உடல் நலம் சரியில்லாதவர்கள், முதியவர்களைக் கயிற்றுக் கட்டிலில் வைத்து மக்கள் சுமந்து செல்கின்றனர். மீட்பு பணிகளுக்கு ஹெலிகொப்டர்களை அளித்து உதவும் படி, சர்வதேச நாடுகளை பிரதமர் யூசுப் ரசா கிலானி கேட்டிருக்கிறார்.

ஸ்வாட் பள்ளத்தாக்கில் குறுகலான மலைப்பகுதிகளில் உணவு பொருட்களைக் கொண்டு செல்லும் 30 கழுதைகளில் இரண்டு மலைச்சரிவில் உருண்டு காயமடைந்துள்ளன.

இத்தகைய மோசமான நிலையையடுத்தே பாகிஸ்தானில் சுதந்திர தின விழா ரத்து செய்யப்படிருந்தது என்பது குறிப்பிடத்தக்கது.

கொலம்பியா பணிகள் விமானம் விபத்து: ஒருவர் மரணம்;119 பேர் காயம்

Virakesari.
கொலம்பியாவின் கரிபியன் தீவில் பயணிகள் ஜெட் விமானம் விபத்துக்குள்ளானதில் 119 பேர் காயமடைந்துள்ளனர். இதன்போது ஒருவர் மாரடைப்பினால் இறந்துள்ளதாக அந்நாட்டு அதிகாரிகள் தெரிவித்துள்ளனர்.

ஒருவர் தவிர, ஏனைய பயணிகள் யாவரும் உயிர் தப்பியது ஆச்சிரியத்தை ஏற்படுத்தியுள்ளது.

கொலம்பியாவில் உள்ள பொகாடோ நகருக்கு போயிங் 737 ஜெட் லைனர் என்ற பயணிகள் விமானம் புறப்பட்டு சென்றது. இதில் 131 பேர் பயணம் செய்தனர். அவர்களில் 6 பேர் விமான ஊழியர்கள்.

அதிகாலை இந்த விமானம் கொலம்பியாவில் சான் ஆண்ட்ரஸ் தீவில் உள்ள விமான நிலையத்தில் திடீரென தரை இறங்கியது. அப்போது கட்டுப்பாட்டை இழந்து ஓடுதளத்தில் தாறுமாறாக ஓடியது.

முன்னதாக தரை இறங்கும்போது விழுந்த வேகத்தில் 3 துண்டாகs சிதறியது. அப்போது விமானத்தின் வால் பகுதியில் தீப்பிடித்தது. இதைப்பார்த்த விமான நிலைய தீயணைப்பு படையினர் விரைந்து வந்து தீயை அணைத்தனர்.

இந்த பயங்கர விபத்தில் ஒரு பயணி மட்டும், அதுவும் மாரடைப்பால் உயிரிழந்தார். அவர் அமர் பெர்னாண்டஸ் டிபரேட்டோ (68).

ஆனால் விமானத்தில் பயணம் செய்த 130 பேர் அதிசயமாக உயிர் பிழைத்தனர். அவர்களில் 119 பேர் சிறுகாயங்களுக்குள்ளாகினர். 5 பேருக்கு மட்டும் பலத்த காயம் ஏற்பட்டது.

இவர்கள் அனைவரும் மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

மின்னல் தாக்கியதால் விமானம் விபத்துக்குள்ளானதாக கொலம்பிய விமான நிலைய அதிகாரிகள் தெரிவித்தனர். இருந்தும் இந்த விபத்து குறித்து விசாரணை நடத்த உத்தரவிடப்பட்டுள்ளது.

மின்னல் தாக்கியதும் விமானி சான் ஆண்ட்ரசில் விமானத்தை தரை இறக்கியுள்ளார். ஏற்கனவே மின்னல் தாக்கியிருந்ததால் தரை இறங்கியபோது விமானம் 3 துண்டாக உடைந்தது என்று அதிகாரிகள் தெரிவித்துள்ளனர்.